Nəsib Göyüşov - 70 » Əlyazmalar İnstitutu
(+994) 12 4923197 AMEA M.Füzuli ad. Əlyazmalar İnstitutunun rəsmi portalı
AZ EN


Nəsib Göyüşov - 70

Azərbaycanın tanınmış şərqşünas - əlyazmaşünas və ədəbiyyatşünas alimi filologiya üzrə elmlər doktoru Nəsib Göyüşovun 70 yaşı tamam olur. O, 1947-ci ildə Kəlbəcər rayonunda anadan olub. 1970-ci ildə Bakı Dövlət Universitetinin şərqşünaslıq fakültəsini fərqlənmə diplomu ilə bitirən N.Göyüşov həmin ildən Azərbaycan Milli Elmlər Akademiyasının Məhəmməd Füzuli adına Əlyazmalar İnstitutunda müxtəlif vəzifələrdə işləmiş, hazırda isə “Farsdilli əlyazmalar” şöbəsinin müdiridir. O, 1981-ci ildə iki ixtisas (“Türk dilləri” və “İran dilləri”) üzrə namizədlik dissertasiyası müdafiə etmiş, 2010-cu ildə isə “Füzulinin sənət və mərifət dünyası” mövzusunda dissertasiya müdafiə edərək elmlər doktoru alimlik dərəcəsi almışdır.
15 kitab və 130-dan çox elmi məqalənin müəllifi olan N.Göyüşov Türkiyə, İran, Kipr, Moskva və Sankt-Peterburqda keçirilən beynəlxalq konfranslarda iştirak edib. Alimin xaricdə bir kitabı və 10 məqaləsi nəşr edilib. N.Göyüşov farsdilli əlyazmaların elmi təsviri və kataloqlaşdırılması, yazılı abidələrin tədqiqi və nəşri, Orta əsrlər farsdilli və türkdilli ədəbiyyat, müsəlman Şərq xalqlarının mədəniyyət və ədəbiyyatı tipologiyası, Şərq ədəbiyyatı nəzəriyyəsi və poetikası, sufizm, sufi ədəbiyyatı və simvolikası, islam mistisizmi və onun bədii təfəkkürlə əlaqəsi sahəsində böyük xidmətləri olan alimdir. Bundan əlavə o, sufizm və klassik müsiqi nəzəriyyəsinə aid bir sıra yazılı abidələrin fars dilindən Azərbaycan dilinə akademik tərcüməsi sahəsində səmərəli fəaliyyət göstərmişdir.
Alimin müxtəlif illərdə “Füzulinin sənət və mərifət dünyası”, “Xalq təbabəti xəzinəsindən” və s. kitabları nəşr olunmuş və böyük rəğbətlə qarşılanmışdır.
Filologiya üzrə elmlər doktoru Nəsib Göyüşovun gənc elmi kadrların hazırlanması, farsdilli əlyazma abidələrinin kataloqlaşdırılması işində mühüm xidmətləri vardır.
Görkəmli şərqşünas - əlyazmaşünas alim Nəsib Göyüşovu AMEA-da çalışan bütün həmkarlarının və “Əlyazmalar yanmır” jurnalının yaradıcı heyətinin adından 70 illik yubileyi münasibətilə səmimi qəlbdən təbrik edir, ona yeni-yeni yaradıcılıq uğurları və möhkəm cansağlığı diləyirəm.


Möhsün Nağısoylu,
AMEA-nın həqiqi üzvü,
filologiya üzrə elmlər doktoru, professor
фильмы бесплатно Можно зайти сюда newprogs.net чтобы скачать все для пк, а так же на allfilm.net посмотреть фильмы
© Copyright, 2018, AMEA Məhəmməd Füzuli ad. Əlyazmalar İnstitutu. Bütün hüquqlar qorunur.
Bağla